بنات الفيصليه

السلام عليكم ورحمه الله وبركاته ,,

 

 

أكيد العنوان غريب لكن للاسف هذا الواقع :( .. هذي الجمله دارجه بشكل كبير بين الشباب وكثير ما اسمعها , الي يروح مجمع الفيصليه أو المملكة أو حتى بعض المجمعات العادية الكبيره يلاحظ أشياء عجيبة وملابس ما تخطر على باله .. الحمد لله ان روحاتي للمجمعات هذي نااادره ولحاجه فقط لكن في الاخير غصب عليك تشوف مناظر عجيبة وغريبه.

العبايات اختلفت كثيييير عن أول , وصرنا نشوف أشكال وأنواع و حتى ألوان مختلفه .. كانت في السابق عبايه على الراس فقط ثم بدأت تطلع الكتف , ومن الكتف بدأت تتفرع الى المخصره والفرنسيه وأسماء كثيره ما ندري عنها.. آخر التقليعات المضحكة هي عبايه البشت ! وتكون مطرزه على أساس البشت الرجالي .. ما صدقت الي قال لي الا لما شفتها قدام عيني في السوق.. وفيه بعض العبايات عليها كتابات وخرابيط مثل Dior >> كانها تقول تراها ماركه انتبهوا :)

الشاهد من الموضوع هو كيف تغيرت العبايه وتحولت من أداة لاخفاء الزينه الى اداه لاظهارها .. ولو عرفوا الهدف من لبس العبايه ما صارت بهالشكل .. وسبحان الله نشوف الفرق بين أوساط الشباب كيف انهم يناظرون المرأه الي لابسه عبايه (نص كم) بدون أي حياء للاسف وكيف انهم يصرفون النظر عن المرأه الي لابسه العبايه بدون أي اغراء او خرابيط هالايام وأيضا غالبا ما تكون أجمل من المرأه المتزينه!

..

خاتمه: كثير ما اسولف مع الاجانب معي في العمل عن مواضيع مختلفه ومره سالني عن سبب الحجاب للمراه وتغطيتها وجهها , فقلت له اذا عندك لؤلؤه ثمينه في داخل الصدفه هل تعرضها امام الناس دائما ليشوفوها ؟ هذي هي المرأه تماما عندنا .. ونظرتهم بالفعل نظره اعجاب وتقدير لهذا الامر ..

 الله يكتب ما فيه الخير ويصلح الحال

نراكم على خــــير :)



12 تعليقات على “بنات الفيصليه”

  1. حلمي معي أضاف بتاريخ

    العبايه لبست عشان العفه والبعد عن الفتنه
    سواء كانت هذه العبايه كتف راس يد الي هي هي بس اهم شي ما تثير فتنه
    وش فايده عبايه على الراس ضيقه وانواع التطريز كانه عرس في العبايه
    ولا عبايه على الكتف ضيقه وكل الوان العالم فيها

    اهم شي تكون ساتره ولا تثير فتنه ولا هي ضيقه

    حلمي معي

  2. أقلام أضاف بتاريخ

    أخي محمد بصدق موضوع في غاية الاهمية وغاية الخطورة
    أغلب أسباب هذا الأمر نتجت عن كون من ينتج تلك الأبسة يصير شيئا فشيئا تابعا لشركات دولية لا علاقة لها بثقافتنا الإسلامية.
    شكرا لك على إثارة هذا الموضوع

  3. AboMuslim أضاف بتاريخ

    أخوي محمد .. الله يصلح الأحوال .. وتراك ذكرتني ببيت جميل يقول:
    فليست المرأة إلا درة ::: وهل يكون الدر في غير الصدف !!

  4. توازن أضاف بتاريخ

    بصرااحه … انا لم أدخل مجمع الفيصلية و لا المملكه ..!!

    الله يصلح شباب المسلمين … : )

  5. admin أضاف بتاريخ

    حلمي معي
    ——
    يعطيك العافيه على التعقيب الجميل.. والله يحفظ بنات المسلمين من كل شر وفتنه ..

    أقلام
    —–
    وهذا الحاصل الان .. أغلب العبائات من شركات فرنسيه او اجنبيه بشكل عام وتتفنن في التطريز والتزيين .. شكرا لمرورك اخوي

    أبو مسلم
    ——
    اللهم امين .. بارك الله فيك ..
    ولا تقطعنا يا شيخ خل نشوفك دايم :)

    توازن
    ——
    أحسن لك ;) .. واذا اضطريت لها لا تروح الا صبح الخميس قبل لا يجون العالم ..
    حياك الله اخوي ..

  6. الهاشمية أضاف بتاريخ

    العبائة فرضت للمرأة حماية لها .. فرضت حفاظاً عليها..
    وعبائة الكتف والفرنسية و…….
    إنما هي من التحايل على الدين..
    وأنا لا ألوم أي شابة ترتديها وإنما ألوم والديها فهم المسؤولون عنها ..

  7. admin أضاف بتاريخ

    الهاشميه
    ………..

    الله يبارك فيك .. ويهدي أولياء الامور .. ويصلحهم ويوفقهم لما فيه خير لهم ولمجتمعهم ..

  8. Turki abdullah أضاف بتاريخ

    Will as expcted since our youth forgot all about our teaching and tradtion. But i hope in the near future that they change to a better teen that keep there faith and not fall to ……..

  9. منال الزهراني/قلم حر أضاف بتاريخ

    أخي محمد ..

    أريد أن أقول كلمة لكل الشباب : لولا نظرات الاعجاب وكلمات الغزل المنسابة من أفواهكم لما لبست الفتيات هذه العبايات ..

    كامرأة أقول النساء في الغالب يلبسن هذه العباءات بحثاً عن ( نظرة ) أو ( التفاتة ) وهذا للأسف ما يفعله لهن الشباب

    شكراً لك محمد

  10. admin أضاف بتاريخ

    تركي
    —–
    نقول ان شاء الله , الله يعطيك العافية أبو عبدالله

    منال
    ——
    ما اختلف معاك , وبكل الحالتين نقول الخطا على ولي الامر سواء من الولد او البنت ..
    يعطيك العافية منال ,,

  11. أختك (-: أضاف بتاريخ

    الحمدلله والشكر ..

    أي وحده أشوفها في السوق بهالشكل أو في الاجتماعات العائلية او بأي مكان .. أعرف أنها تعاني من نقص في الشخصية ..

    لا والحين صار الشعار ( اكشفي أكثر تصيرين كشخه أكثر ) .. على بالهم ان الكشخة و (الموديرن ) تصير كذا ..

    للأسف والله عباياتهم يحتاج لها عباية ..

    الله يثبتنا ….

  12. saam أضاف بتاريخ

    مشكوره يا اخ محمد على هالموضوع الي قاعدين نتكلم عنهم يستفيدون لاني الاحظ بما اني اعمل في الفيصليه انهو لا حياة لمن تنادي

    واسال الله الستر لنا ولاخواتنا يارب

شارك بتعليقك

شاهد أيضا